Saunoaga ale Minisita o Tina ma Tama’ita’i, Atina’e o Nu’u ma Aga Feso’ota’i, Le Afioga Faimalotoa Kika Stowers e tatala aloa’ia ai le Tauvaga ole Tausala Samoa 2018, Faletalimalo Taumeasina Resort

Saunoaga ale Minisita o Tina ma Tama’ita’i, Atina’e o Nu’u ma Aga Feso’ota’i, Le Afioga Faimalotoa Kika Stowers e tatala aloa’ia ai le Tauvaga ole Tausala Samoa 2018, Faletalimalo Taumeasina Resort

Oute muamua ona ou taia le tutafa’itoa e pei o le tala i le ava nai Utualama ma ou ta le tavai ma too ae sulua le too ma tula auā ua aliitia fanua ma ua tau fai mati’e le matila ma le ofeloa ma ua malumaunu le fogatia seu o alii aua o lele ua nofoia sua ma auololo i le paia maualuga o lenei aso.

I le susu o lau susuga i le taitai o le sauniga

Susu Tamaitai Tauva uma o le tauvaga tausala o lenei tausaga 2018

Aemaise o le paia maualuga i Pulega o Kamupani, o Pisinisi ma Faalapotopotoga uma o lo’o latou lagolagoina lenei faamoemoe aua le sailia o se Tausala 2018.

Ua tatou potopoto mai i lenei aso, sei o tatou faama’alo iuofe a tautai ma faamanusina le atu o le taeao auā le sao tāua o tamaitai i le atunuu.

O le muagagana e masani ai le atunuu, “E au le ina’ilau a Tamaitai”

O se muagagana e manatua ai pea le sao tāua o tamaitai i la tatou aganuu ma le agaifanua.

O se muagagana na afua mai ina ua tu malo faiva o tamaitai sa latou āsaina mai le gāsu o le tai taeao ma o lo’o avea pea o se mau tauave e manatua ai pea ā latou galuega lelei i le lalagaina mai o le sao tāua o tamaitai i lo tatou atunuu. O se muagagana foi o lo’o tāolaola ai pea malosiaga o tamatai i le mafaia lea ona ausia o so’o se sini ma so’o se faamoemoe. A o se muagagana foi o lo’o avea pea ma faamalosia’u i so’o se tamaitai Samoa e ala i tiute ma matafaoi o lo’o auauna ma tautua ai.

Ua le mafaitaulia le sao taua o tamaitai i le atina’eina o aiga, o nu’u ma ekalesia aemaise o le atunuu atoa.

Ua maitauina le maopopo o aiga ona o galuega faifaipea a tamaitai. O lo latou faalupega “O le pae ma le auli. E teuteu ma faamafolafola mea ua faaletonu i totonu o aiga. O le i’omata foi i le va feagai ai ma le tuagane aua o lana feagaiga tausi i totonu o aiga.

O le mafua’aga lea e taua ai le tamaitai Samoa i le tatou aganuu ona o lea fa’aaloalo maualuga. Ua maitauina le maualuga o le tula’i mai o tamaitai e toe faaolaola nisi o ā tatou measina ma agaifanua i totonu o nu’u ma afioga. Ua iloga foi le tulai mai o tamaitai i le faamaopopoina o ekalesia e ala i mea fai ma ua ulu ola ma ta’alaolao le talalelei ona o a outou galuega lelei. A maitau foi i le atina’eina o le atunuu, ua tele le sao o tamaitai. E le gata i le unaia o le tamaoaiga e ala i pisinisi ma galuega fai ae ua avea foi le tele o tamaitai ma faauluuluga o Matagaluega ma Faalapotopotoga Tumaoti a le Malo.

O molimau ola ia o le maualuga o le sao o tamaitai i le galuega fai ma le atina’eina o lo tatou atunuu.

O le asō ma le faamoemoe aua le sailia o se tausala o Samoa 2018. O lo outou sao taua lena i le saga unaia pea o la outou mau tauave, “E au le ina’ilau a tamatai” e ala lea i le faalauiloaina o lo tatou atunuu o Samoa i le lalolagi atoa. Aua o le taua o lo outou tulai e fa’aauau la outou mau tauave e ala i le faalauiloaina o le matagofie o Samoa i le lalolagi atoa o le fesoasoani foi lea i lo tatou malo e ala lea i le atina’eina o lona tamaoaiga. O lo’o ave pea foi le faataua a le malo i le sao taua o tamaitai i lo tatou atunuu. O le mea lea sagai ane ai o le tai e fa’aauau la outou pitolaau e ala i o outou tiute fai ma matafaoi fa’atamaitai Samoa aua lava se manuia alualu i luma o lo tatou atunuu.

Ia manuia le alo atu i le sailia o se tausala o Samoa 2018. Ia manuia foi lau tapuaiga Samoa.

Soifua ma ia Manuia

Leave a Reply

Your email address will not be published. Required fields are marked *